نجوم في سماء هندسونا (محمد فخر الدين)
نجوم في سماء هندسونا (محمد فخر الدين)-مدونة وائل
لقاءات "نجوم في سماء هندسونا"
مع الباشمهندس محمد فخر الدين
١/عرفنا عنك شوية البطاقة التعريفية....؟!
محمد فخرالدين التجاني احمد ، من ابو حمد ، مواليد ابو حمد قريت الابتدائي في السليم الاساسيه بنين والغابه الاساسيه ، والثانوي في مدرسه ابوحمد الثانوية النموذجية بنين واخيرا يعني جامعه وادي النيل كليه الهندسه قسم هندسه التصنيع و فخور جدا فخور جدا بالقسم دا
٢/ كلية الهندسة فيها جوانب إيجابية وجوانب سلبية في رايك أهم النقاط في الجانبين شنو....؟!
الايجابيات في هندسه كثيره شديد دي حاجه باحمد ربنا عليها اللي هي ترابط الاخوي القوي ،د ما حاجه كلام ساي انا بالذات لامست الكلام ده واقع بالجد ناس اخوان و يمكن يكون اكثر ، كان في مره عملت عمليه في المستشفى ، وقفوا اخواني معاي لدرجة اخوي شقيقي م قدر يركب معاي الركشة ، م لقى طريقه
يلا الحاجه دي ما معاي انا بس ، اي واحد من هندسه يحصل ليهو ظرف تلقى حولينو الف من طلاب هندسه، بقيفوا معاك ويساندوك ويقضوا حاجتك ولو على حساب نفسو
ف بالجد دي حاجة محتاجة الانسان يحمد ربنا عليها ، وزي ما بيقولوا معرفة الرجال كنز ودا لقيناهو في هندسه.
اما السلبيات ف اخطر حاجه فيها اللي هي المجاهرة وعدم السعله ، سوا كان في اللبس بصورة عامة للجنسين، والخلط الشاذ بالذات عمارة مدنيه ، د شنو البحصل دا !، انا بقترح تكون فرق مداهمة والله جد ، الناس تلحق الشغله دي قبل يحصل ما لا يحمد عقباه،
زايد البرالمة الما ساعلين في زووول ، وعووا الناس دي .
٣/رايك شنو في الظواهر السالبة البدت تظهر في كليتنا من مخدرات وزي البنات وغيرها.....؟!
اول حاجه الظواهر دي كلها م بتشبه طالب هندسي نهائيا ، ابسط حاجه تميز الطالب الهندسي المسؤليه
وانا شايف انو الادارة ليها يد في البيحصل دا ، يعني على الاقل تكون في قوانين ولوائح تمنح الكلام دا،
يعني خليك من نحن مسلمين ،كسودانيين م بنرضى بالكلام دا
٤/ لو قلت ليك عايز التزم بتنصحني بي شنو....؟!
شوف ي اخوي الصلاح ببدا من النفس ، والقلب الحي بيدل سيدو للحق، اول حاجه ما شرط لمن تلتزم تبقى شيخ ، دي م عندها علاقة ، بس ابق مسلم طايع لي ربك ولي رسوله صلى الله عليه وسلم ،ونفسك لمن تحدثك بالخير اعرف انو قلبك حي ، وادعي ربنا كتييير انو يهديك ،والدعاء سلاح قوي ، واجتهد قدر م تقدر على الطاعات، الله سبحانه وتعالى يقول :"والذين جاهدوا فينا لنهدينهم سُبلنا"
ألخصها ليك في خمس خطوات
_اذكر الله سبحانه وتعالى كثير
"والذاكرين الله كثيرا والذاكرات "
_قراءة القرآن ، يقول الله سبحانه وتعالى:"إنا سمعنا قرآنا عجبا ،،يهدي الى الرشد"
_الصلاة والمحافظة عليها في وقتها
_غض البصر
_الصحبة الصالحة البي تعينك على الطاعة
٥/ حاجه المفروض تكون موجودة في الكلية حسب وجهة نظرك.....؟!
بيئة مناسبة للطالب الهندسي والجامعي
من كل النواحي
٦/ علاقتك كيف مع العمل العام في الكلية..؟
تعبان...
م اتوفقت في اني اقدم حاجه
٧/ اتكلم لينا عن شخصية انت بتكن ليها الاحترام داخل الكلية....؟!
هندسة فيها شخصيات كتيرة محترمة كتيرة شديد وتفرض عليك انك تحترمها
بس لو في زووول بكن ليهو الاحترام اكتر ح يكون عم محمد
زوول بشوش وطيب ، واكتر حاجه بي تجذبني للزووول واني اكن ليهو الاحترام السلام القوي ، ما قوي قوي، لا ، بي ابتسامة وسؤال عن الحال والاحوال والاهل ، السلام البيحسسك بي طيبة الزووول
٨/ اكتر شيخ بتسمع ليهو خطب ومحاضرات منو...؟!
محمد سيد حاج رحمة الله عليه
٩/رايك شنو في مصطلح عيش شبابك 
البنشمع بيهو اي حاجه....؟!
البنشمع بيهو اي حاجه....؟!يلا شايف السؤال بتاع الالتزام د عكسوا طوالي ، 
ليه؟ ، لانو مرحلة الشباب م مبرر لي انك تعمل ايه حاجه تهفى ليك
لازم تكون مضبوطة بحكم شرعي ، والحكم الشرعي ما بينافي انو الزووول يعيش ، بس يكون بي ضوابط
والدين م معناتو الزووول يبعد عن الحياة ، بس يبعد عن الحرام
١٠/ كلمة ختااام للبرنامج والجمهور....؟!
اول حاج شاكر جدا جدا للاستضافه دي ، وعلى العين والراس ، ومقدر ليك كتييير ،ودي حاجه جمييله تحسب ليك في كلية الهندسة.
والبرنامج فكرة جديدة جميلة مبتكرة ، ودي حاجات مطلوبه في التجديد والتغييير .
اول حاجة شكر كتيييير لي دفعتي دفعة كفاح ، والله بختي بي اخوان زيكم
وشكر للبرالمة الدايمة قاعدين يتحفوني بي محبتهم ، ربنا يقدرنا نكون عند حسن الظن دا
شكرا جميلا
من الجمهور....
كفاح دي متفوقة في مختلف النشاطات ليه ماشلتوا دوري كرة الطائرة من منظورك السبب شنو؟
السبب اني كنت عامل عمليه الحكيت عنها فوق
وكان لعبت في الشوط التاني بعد م اتغلبنا في الشوط الاول وغلبني الصبر
ف اضطريت خشيت بس م قدمت المجهود المطلوب
بس ان شاء الله نعوض في الجايه