نجوم في سماء هندسونا ( محمد سراج )
نجوم في سماء هندسونا ( محمد سراج )-مدونة وائل
لقاءات "نجوم في سماء هندسونا"
مع الباشمهندس محمد سراج
١/عرفنا عنك شوية البطاقة التعريفية....؟!
محمد سراج الدين الحاج ابراهيم من مواليد ١٩٩٩ شهر ٧ من سكان مدينة عطبره مراحل التعليم مدرسة المعهد الاساسيه والجيش النموذجيه الاساسيه والشمالي الاساسيه ومدرسة الشهيد محمد احمد البشير الثانويه وكليه الهندسه وادي النيل من قبيله الرباطاب الوالد من الرباطاب ابوحمد والوالده من الشماليه كورتي
٢/هل العمل العام بأثر على الجوانب الاكاديميه...؟!
يؤثر بشكل ملحوظ لان الانسان بيزيد من المسؤوليات المتراكمة عليه فيطره انو يضحي بجز كبير من وقتو وبالتالي من تركيزو في المحاضرات لأنك شايل هم الاجتماعات والمشاكل التي يجب أن تحلها وغيرو...
٣/ حاجه المفروض تكون موجودة في الكلية حسب وجهة نظرك....؟!
جمعيه تساعد الطلاب والاساتذه على الابتكار والتطور ومواكبت التكنولوجيا لان بقيمافي فكر علمي لي الكليه الطلبه بقيرو وماعرفين بيقرو في شنو بس بيحفظو ويفرغو في الامتحان لازم التطبيقات العمليه لكي تساعد في النهوض العلمي خاصتا جانب البرمجيات
٤/ رايك شنو في الظواهر السالبة البدت تظهر في كليتنا من مخدرات وزي فاضح. غيرها....؟!
انتشرت المخدرات في السودان كله بطريقه غريبه وسريعه جدا وخاصه في الشباب وهذه طفره جديده على الكليه وعلي مر السنين كلية الهندسه ما كان فيها هذه الأشياء لكن نناشد جميع الفائت الموجوده من أحزاب وجماعات على محاربه هذه الطفيليات واخراجها من الكليه ومن الشباب
٥/ هل بتفتكر الرابطه قدمت في الجانب الأكاديمي المطلوب منها ولو في تقصير تفتكر السبب شنو....؟!
الفتره الفاتت كانت مليا بالمشاكل الاكاديميه علشان كدا المكتب كان بيحل المشاكل بس ما لقينا فرصه لي الإبداع كنا في منطقه محدده ولكن المكتب الاكاديمي كان يحتوي على مجموعه من المبدعين في المجال وكانو قادرين على تغير الكليه الي الافضل لكن الظروف ما سمحة
٦/ احكي لينا قصة السكرتيرة(من الجمهور)....؟!
دي قصه خاصه
٧/ استاذك المفضل منو...؟!
أ. رانيا و د. مجاهد
٨/ عايزك تقدم خطوط عريضه لزول عايز يحسن من معدلاتو ويبقى بروف...؟!
اهم حاجه الهدف والايمان به ثم الاجتهاد لي تحقيق الهدف وأهم حاجه تخط خطه لازم تلتزم بيها ما لازم تقرأ كتير ممكن تقرأ ايام الإمتحانات لكن اهم حاجه التركز في المحاضرات لأنك البتلقاه في المحاضره ما بتلقها في قرايتك براك والقرايه الجماعيه مهم شديد
٩/ لو اديتك. مصباح علاء الدين حا تتمنى شنو...؟!
ابقى رئيس لي السودان علشان احسم الفوضه الحاصله دي
١٠/ خارج الصندوق (علاقتك كيف مع البنات داخل الكلية)....؟!
علاقه في منتها الجمال زي بنات هندسه مابتلقا خوه وسند ودعم وقمه في الاحترام
١١/ شخصية بتكن ليها الاحترام داخل الكلية...؟!
عم كيمو
١٢/الصعوبات الواجهتك في المكتب الاكاديمي ؟والفايده اللقيتها من التجربه دي شنو(من الجمهور). ؟
والله قدرتا اتعامل مع الجه الاداريه بشكل مباشر مما أدنى فكره عن اداره المؤسسات وأصبح عندي فكره عن العمل الجماعي والانضباط وتقبل جميع الاراء وتحمل المصاعب والتفكير في أحوال الطلاب حسن من مستوى الفكري
١٣/الي ماذا توصلتم في موضوع المكتبه(من الجمهور) ...؟!
والله المكتبه موضوعا طويل شديد ونحنا اجتهدنا فيه وان شاء الله نحاول نساعد الجيل القادم في تطويرها والعمل على المشروع
14/زولك نيوتن ولا أينشتاين ؟ ولماذا ؟
زولي بن الهيثم
علشان عالم شامل مافي مجال واحد
١٥/ كلمة ختااام للبرنامج والجمهور.....؟!
ربنا يبارك فيكم ويؤفقكم ودا برنامج جميل جدا لانو بيعرض ارا بعض الطلاب وبيقوي علاقة الطالب بالكليه وبالطلابه الآخرين ويعطيك الفرصه انك تستفيد من تجربه غيرك وتحسن من اداك ونتمنى انكم ما توقفو البرنامج دا اصل ونسأل الله التوفيق لي الجميع والكليه ترجع أقوى من الاول