نجوم في سماء هندسونا (احمد نورالدين)
نجوم في سماء هندسونا (احمد نورالدين)_مدونة وائل
لقاءات "نجوم في سماء هندسونا"
مع الباشمهندس أحمد نور الدين
١/ عرفنا عنك شوية البطاقة التعريفية...؟!
احمد نورالدين من مواليد مدينة الدامر عام ١٩٩٩ ، المراحل التعليمية مدرسة الفريع الاساسية ثم المجزوب الثانوية
واخيرا كلية الهندسة والتقنية قسم التصنيع
💥💥💥💥
٢/ أكبر شخصية معارضه في دفعه كفاح والزول الوحيد الكاسر حنك الدفعه دي ليه....؟!
نظام الكلية نظام تخصصات اكتر من كونو نظام قائم علي اساس الدفعة ككل ، الدفعة ككل بتتركز علي جانبين الجانب الرياضي والاجتماعي، وقد تكون في حاجات انا ما شايفه نسبة لانو بعيد من الدفعة وتفاصيلها والله اعلم
💥💥💥💥
٣/ اتهمت انك كوز وجهاز أمن الكلام ده صاح...؟! وفي تقديرك الناس قالت كده ليه...؟!
عموما الفترة الاولي من الثورة كانت معظمها عبارة عن تخوينات ، وكمية من الطلاب اتخونو بسبب مواقفهم ضد الناس الكانت بتقود الحراك ، واحده من الاسباب انو عندي اصحاب واخوان بالنسبة لي عندهم انتماء للحزب وشاركت معاهم في كذه من المراحل في السابق ولو اتيحت لي الفرصة تاني مستعد اخدمهم، في الاخير كلام الناس ما حيقدم للزول حاجة لو ركز معاهم ، اهم حاجة الزول يعمل الحاجة المقتنع بيهاا حتي لو خالف الناس
💥💥💥💥
٤/ عندك تعليقات كتيرة خلت جزو كبير من الطلاب تفهم انك شخصيه هدامة..؟!
مشاكل الكلية كتيرة وفي الفترة السابقة اتفاقمت لدرجة كبيرة
وكل طالب بنظر للمشكلة من منظورو الشخصي ، وكل زول بقدم حلول علي حسب فهمو للمشكلة ، الحاجة البتخليني اعلق تعليقات مكاجرة علي قول العميد 😁 ، انو في مشاكل ما محتاجة اجتهاد كتير وبكون الحل بسيط بس دايما الناس بتتجه للحل الصعب 😶
💥💥💥💥
٥/ رايك شنو في الكوادر السياسيه داخل الكلية وهل بتعتقد انها بتقدم فائدة للكلية...؟!
علاقتي مع جزء بسيط منهم
وفيهم البقدم المصلحة العامة علي مصلحة الحزب وفيهم العكس ، نسبة الوعي داخل الكلية ماشه في تدني ، فما شايف الكوادر الحاليا دي ممكن تقدم فائدة للطلاب
💥💥💥💥
٦/بتفتكر أكبر مشاكل العمل العام في الكلية شنو...؟!
الشلليات و في ناس بتحب تمشي الامور بمفهومها الخاص بغض النظر عن بقية الناس رأيهم شنو ، ده غير الكوادر السياسية
💥💥💥💥
٧/ علاقتك كيف مع الجنس الآخر....؟!
ضعيفة ، ويمكن الناس شايفة عكس كده 😅😅
💥💥💥💥
٨/ تقيمك لرابطه كلية الهندسة....؟!
ما عندي احتكاك مع الرابطة الا عن طريقة المشاكل البتكون عملت ضجة اعلامية في الفيس
لكن غير كده بعرف فيهم عدد بسيط وهم اولاد دفعتي الموجودين في الرابطة
كتقيم عام للمشاكل الظهرت وتعامل الرابطة معاهاا
بديهم ٦ من ١٠
ودي نسبة كويسة كاول رابطة
بالنسبة لي ، لكن بشوف انو قائمة الاصلاح كان حتقدم اكتر للكلية
ولله اعلي واعلم
💥💥💥💥
٩/مشكلتك شنو مع أحزاب اليسار...؟!
علاقتي بيهم طيبة ياااخ 😅 ، بس لو خلو الافكار العلمانية كان حيكون عندهم دور فعال في الكلية نسبة لخبرتهم في العمل العام
💥💥💥💥
١٠/ حاجه في الكلية شايف انها مفروض تتغير....؟!
ولله الكلية فيهاا كمية من الظواهر السالبة الظهرت في الفترة الاخيرة ، المخدرات ولبس اخواتنا الطالبات.
فالمفروض تتعدل اللوائح الضباطة للطلاب بما يليق بمؤسسة تعليمية وكلية مرموقة كهندسة عطبرة.
عموما في تفاصيل مخجلة ظهرت علي مستوي الدفع التحتنا بالذات طلاب ١٩ و٢٠ و٢١
فتعديل اللوائح حيحد من الظواهر دي داخل الكلية علي الاقل عسي ولعل ربنا يهديهم ويهدينا ❤️
💥💥💥💥
💥💥من الجمهور ر...... 💥💥
١/ برأيك (و انت كنت جزء من منظومة الطلاب الاسلاميبن ) السبب شنو في ضعف التنظيم و عدم قدرته علي التمدد داخل كلية الهندسة حتي غي الفترة اللي كان فيها فارض سيطرته علي جامعات السودان ؟
ده بيعتمد علي مفهومك انت وقربك للتنظيمات السياسية داخل الكلية !!
وبعد سؤالك دا اقتنعت بانك من القطيع المسيوق داخل الكلية 🤷🏻♂️🤷🏻♂️
واسمح لي اسألك سؤال
هل انت بتعتقد انهاا ما متمدده !؟؟
💥💥💥
2/مظاهرات 2016 انت كنت مكلف برفع تقارير دورية في الكلية و شوهدت مع مجموعة من طلاب الحركة مغادرين الكلية من الباب الخلفي و هناك اتهام بأنك كنت السبب في اعتقال بعض الطلاب من مقر سكنهم ؟
🤣🤣🤣🤣🤣🤣🤣🤣🤣💔💔💔
طبعا قصة مضحكة جدا ويا ريت الشخص السأل السؤال ده يظهر لي ونجي نشرب جبنة ويحكي لي القصة ده 🤣🤣🤣🤣💔💔
٢٠١٦ وتحديدا اليوم ده
كنتا في لاب فيزياء ومشغلين المكيفات وباب اللاب كان قافل
فكنا بعيدين كل البعد عن التفاصيل الحصلت داخل الكلية
ولما طلعنا من اللاب اكتشفنا انو كان في مظاهرات وفي طلاب اعتقلوهم ، فما اهتميت بالموضوع وكنتا طالع البيت طوالي
فلما وصلت المدخل الامامي للكلية
صادفت الباش مهندس محمد مامون وحكي لي بتفاصيل المظاهرات ووراني انو البطلع من الكلية بتم اعتقالو لانو الشرطة والجهاز بره
فنصحني بانو انتظر لحدي الامور ما تهدا شوية واطلع
فطلعت قبل المغرب من الكلية 🤷🏻♂️🤷🏻♂️
لكن القصة الفي سؤال الاخ الكريم ده انا زاتي جديدة علي 🤣🤣🤣🤣💔💔💔
💥💥💥
3/هل انت نادم علي خوض تجربة الحركة الاسلامية ؟ و هل تتمني عودة الإسلاميين للحكم ؟
الحياة عبارة عن معترك من التجارب وكل تجربة هي وسيلة للتعلم وتغيير مفاهيم بالنسبة للانسان
علي الصعيد الشخصي انا اتعلمت كتير من الاسلاميين وكانو خير الناس بالنسبة لي علي مستوي الكلية،
+
كل شخص وهو حر يخش في التنظيم البريحو ، الثورة جات وخربت المفهوم ده !!
ورسولنا الكريم صلوات الله عليه قال في الحديث الشريف ( من حسن اسلام المرء ترك ما لا يعنيه )
فحياتي الخاصة وفهمي ومعتقداتي حتي لو مختلفة معاك دي حاجة ما المفترض انت تحكم بيها علي
احكم علي من خلال تعاملي معاك ده اذ حصل لينا الشرف وقعدنا مع بعض قبل كده 🤍😅
بالنسبة لاضافة السؤال
بعد الحصل في فترة ال٣ سنة الفاتت
ومن ناحية افضلية افضل لي الاسلاميين من شلة العفن القاعد ده 🤷🏻♂️🤷🏻♂️
فاذا عندي الخيار ده فبجيبهم الحكم
💥💥💥
4/هل عندك رغبه تنضم لي تنظيمات تانيه؟
واذا خيروك بين التنظيمات الفي الكليه بتختار تنضم لي اي تنظيم؟
هل حاليا توجد تنظيمات !؟؟
بشوف انو حاليا التنظيمات دي كلها بمختلف تنوعاتها بتسعي لمناصب وكسب سياسي ما اكتر من كده اما المصلحة العامة فدي بعيدين منها كل البعد
في الفترة دي بالذات البنضم لتنظيم سياسي حيضيع روحه ومستقبلو
التنظيم الممكن اخشو اذا خيروني
هو جماعة انصار السنة
مع بعض التحفظات للجوانب السياسية 😅😅
💥💥💥
🍁قول ليه من تجربتك رايك شنو في الخلفاء ديل وناقصهم شنو عشان يبقو زي الكيزان 🌚...؟!
قول الناقصهم شنو عشان يبقو ناس في الاول 😬
+ نحنا نتمنا انو الكيزان يبقو زيهم 🙊🌚
الكلية فقدت كوارد علي مستوي عالي جدا
فصعب علي الدفع الجديده دي تقدر تتعامل مع قضايا الكلية في السنين القادمة
لكن علي مستوس الخلط والفارغة فحيكونو الاوائل ماف زول بحصلهم 🚶🏻♂️🚶🏻♂️
💥💥💥
5/ما هو السبب وراء تقلب مواقفك تجاه الرابطة و هل للموضوع علاقة بخطك السياسي ؟
موقفي بكون علي حسب تعامل الرابطة مع قضية معينة !!
مش عشوائي زي ما صاحب السؤال هو فاهم
مثلا
تعامل الرابطة مع موضوع ربيت دفعة ١٨
كان حل منطقي وفي وقتو
والرابطة هنا عملت العليهاا وزيادة
بس حصل العكس تماما في تعاملهم مع امتحان البيئة والسلامة في السمستر السابق
تصرفهم كان من اجل مصلحة الرابطة في رأي في حد زاتها بعيدها عن مصلحتنا نحنا كطلاب
ولله اعلي واعلم بالنوايا والخفايا
+ وضحت مثالين فوق
فصاحب العقل يميز تاني 😅😅