نجوم في سماء هندسونا (احمد علي مصطفى)

نجوم في سماء هندسونا (احمد علي مصطفى)-مدونة وائل

 لقاءات "نجوم في سماء هندسونا"

مع الباشمهندس احمد علي مصطفى

١/ عرفنا عنك شوية البطاقة التعريفية.....؟!

احمد علي مصطفى من مواليد الخرطوم 23 سنه الثانوي الشيخ مصطفى الامين النموذجيه ثم جامعة وادي النيل تخصص الميكانيكا ..

٢/ أكثر النقاط الإيجابية الخلت مكتب كفاح يحقق ما حققو شنو...؟!

كفاح دي عندها ميزات كتيره خلتها انها تتصدر المشهد اهمها :-

١/ اننا كلنا محبين للكيان الكفاحي ومستعدين نبذل ليه كل ما بوسعنا علشان يتصدر ويلمع نجمو.

٢/ الشخصيات الكانت على زمام الامور كلها شخصيات ممتازه .. وديل الكلام عنهم يطول

٣/الدعم اللقيناهو. من الدفعه كان كبييير جدا جدا .. وزي ما قال محمد فتحي في كشف في خلال يومين نحن وصلتنا قروش كتيره جدا انا شخصيا ما كنت متوقعها الا ان الناس محبين للكيان دا ظهرو بالصوره المطلوبه الحمد لله

٣/ من وجهة نظرك ما هي أكبر مشاكل العمل العام في الكلية....؟!

والله المشاكل كتيره جدا .. بس ممكن تتلخص في فكرة الشلليات. والهدم الواضح لشغل بعض ..

المشكله الاكبر ان الموضوع دا ماشي يتوارث ودي كارثه نسال الله السلامه بس

٤/ رايك شنو في الظواهر السالبة البدت تظهر في كليتنا من مخدرات وزي البنات وغيرها....؟!

والله انا لحدي قريب ما كنت متوقع الموضع بالضخامة دي ..

لكن لقيت الموضوع مستفحل للاسف وبقى في بيع وشراء داخل الكليه (ديلرات ) ودي كارثه كبرى طبعا .. لدرجه ادارة الكليه حست وعملت اجراءات بتاعت شراب السجاير داخل القاعة ودي حاجه جديده على مجتمع هندسونا. نسال الله السلامه بس

والله كل الحزن لمن تلقى مهندس اهلو راجنو بالحاله دي

٥/ لو حاتنضم لتنظيم داخل الكلية حايكون منو ولية....؟!

والله ما بحب السياسه وما ركزته معاها الا بعد الثوره .. فابشرك ما ح انتمي لحزب سياسي ابدا ..

٦/ انتو كقائمة كانت مشاركة في انتخابات الرابطه القديمه ليه انسحبتو من البدايات....؟!

والله لعدة اسباب اهمها ان كان في مؤشر تقصير من جزء من اعضاء المكتب وعلى راسهم انا في عدم حضورهم لوحده من محاكمات اهم قضيه لهندسونا وهي قضية الشهيد طارق احمد علي ربنا يرحمو ان شاء الله ..

لو سمحتو لي دي فرصه عشان احي التيم الكان معاي وبخصص بالتحيه دي الاتخرجوا مننا (احمد الشاعر -ود النور -جعفر ) وديل نجوم لا غبار عليهم

٧/ تقيمك لأداء رابطة كلية الهندسة والتقنية.....؟!

والله الناس ديل انا اشتغلته معاهم في كم موضوع وشفته حجم التحديات البواجهوها. اكون ظالم لو اديتهم تقيم اقل من الممتاز واسال الله التوفيق للرابطه الجايه.

٨/حاجه في الكلية المفترض تكون موجودة...؟!

النادي العلمي .. دا غير ان مفيد جدا .. لو اشتغل بالصوره المطلوبه ح يقضي على الظواهر السالبه بصوره كبيره جدا.

٩/ خارج الصندوق ( علاقتك كيف مع الجنس الآخر)....؟!

ممتاز والحمد لله

١٠/ شخصية بتكن ليها الاحترام داخل الكلية...؟!

والله الشخصيات كتيره جدا ..

بس اهمهم الناس الاتوفقو وحفظو القران الكريم خلال السنه الفاتت دي وفي ناس حفظهم الصحيحين برضو .. يعني يجبروك على الاحترام

١١/ كلمة ختااام للبرنامج والجمهور....؟!

يا ريت نخلي الشلييات وتدمير شغل بعض ونحاول عشان نكون هندسونا من جديد زي ما لقيناها نطلع نشجع هندسونا في الكوره مع طب والطائره مع تربيه والبنق مع تقانه تعالو نترابط من جديد تقيف مع بعض في الصغيره والكبيره

في الاخير انا بشكر جدا القائمين على المقابلات دي ودة مجهود اضافي على حقهم وبحيهم على الفكره الجديده دي وانا من محبين الافكار الجديده واتمنى يواصلو في الابداع