نجوم في سماء هندسونا (محمد علي ابراهيم)
نجوم في سماء هندسونا (محمد علي ابراهيم)-مدونة وائل
لقاءات "نجوم في سماء هندسونا"
مع الباشمهندس محمد علي ابراهيم
١/ عرفنا عنك شوية (البطاقه التعريفية)...؟!
محمد علي إبراهيم من الولاية الشمالية محلية مروي منطقة القرير المراحل الدراسية كانت مابين القرير ودنقلا حتى وصل بنا قطار الحياة السريع إلى كلية الهندسة عطبره (قسم الهندسة الكهربائية المستوى الخامس)
٢/ما هي أكبر عقبة أمام العمل العام في الكلية حسب وجهة نظرك...؟!
مشكلة العمل العام في الكليه هي إحتكار العمل العام في شخصيات معينه يعني فلان هو العمل العام ودي مشكله كبيره إشكالها بيكمن في إنو زوال العمل العام بيكون بزوال الشخصيه والعكس صحيح عشان كدا لازم كل طلاب كلية الهندسة يقحمو نفسهم ويخوضوا تجارب العمل العام ويكسروا الجمود الحاصل
٣/ هناك إدعاء بأنك كنت تحاول تمرير أجندة سياسية لحزب معين داخل الرابطة ما صحة هذا الإدعاء ؟
أسهل حاجة الإدعاء بس زي ما قال سيدنا عمر بن الخطاب (البينة على من إدعى) وبتمنى من أصحاب الإدعاءات المواجهة.
والمواجهة هنا ما من باب المصادمه بس من باب وضع النقاط على الحروف
الحاجة التانيه كلمة (أجنده سياسيه) الذكرتها دي مصطلح فضفاض محتاج تفصيل وتفكيك ونقاشات لأنه أكبر مشاكلنا هو التلاعب بالألفاظ بدون إدراك
٤/ عدد كبير من الطلاب بتحدثو عن فشل الدورة الأولى للرابطه وأنو التجربه كانت مخيبة للآمال بصفتك رئيس للرابطه رايك شنو....؟!
يارااااجل!!! عدد كبير دي هجمتني طبعاً. حسب وجهة نظري تركيبة السؤال ما صحيحه لأنو انا المعلومه البعرفها عكس الموجوده في سؤالك
بس عايز أقوليك حتى ولو كلامك دا صحيح أحب أقول ليك إنو الفشل ما نهاية مشوار وبالذات في التجارب التأسيسية نغلط ونصحح وتاني نغلط ونصحح لحدي ما نقدر نجيب الجسم القوي البيشبهنا كلنا
٥/هل انت مع تولى الطالبات لمنصب الرئيس في المكاتب التنفيذية أو لا.....؟!
سؤال ظابط بس فيهو شوية من التعميم لأنه الإجابة ممكن تكون (نعم) في موضع وممكن تكون (لا) في موضع تاني
الحاجة دي بتكون على حسب طبيعة المكاتب التنفيذيه وطبيعة البيئة البتحتضن المكاتب دي
بس انا بشوف إنو المناصب لِمَن هُم أهلُُ لها بإختصار يعني
٦/ رايك شنو في الظواهر السالبة البدت تظهر في كليتنا من مخدرات وزي فاضح وتحرش....؟!
للأسف الشديد في ظواهر كتيره سالبه ودخيله ظهرت في كليتنا ظوهر للأسف ما بتشبه مجتمع هندسه بس بحب اقول إنو الظواهر دي كلنا لازم نكون أدوات لمحاربتها ودورنا الرئيسي والسبيل الوحيد في محاربتها هو التوعية بعيداً من المصادمه
٧/تقدمت بإستقالتك من منصب رئيس رابطة الطلاب في وقت كانت الرابطة فيه لأمس الحوجة لتوحيد صفوفها ، ماهو السبب وراء تقديم الإستقالة ؟ و ما صحة الحديث المتداول عن انك تعرضت لضغط من جهات معينة لتقديم استقالتك ؟
النقابات تختلف بإختلاف مؤسساتها وتخصصاتها بس بتتفق في قضيتين أساسيات (القضيه الوطنيه والقضية الأخلاقيه)
تقديم الإستقاله من الرابطه كان لأسباب معلنه وأنا ذكرتها وحسب وجهة نظري أسباب منطقيه وتوحيد الصفوف الذكرتو في سؤالك ما كان محتاجه ليهو الرابطه بس بقدر ما محتاجه ليهو كل الحركه الطلابيه بل كل الوطن في الفترة الحرجة الحصلت فيها الإستقالة
—أما سؤالك عن الضغط في ضغط وحيد انا إتعرضت ليهو وهو الكان سبب في تقديم الإستقاله هو الجانب الأخلاقي الكان البحتم علي إنو مواقفنا حينما يحتدم الصراع بين الحق والباطل ممنوع فيها الحياد
٨/حاجه المفروض تكون موجودة في الكلية حسب وجهة نظرك.....؟!
الكلية بتفقد حاجات كتيره بس بتمنى إنو يكون في صندوق مجتمعي قاعد على مستوى الكليه يدعم الطلاب المتعثرين بالذات في الدفع الجديده ( الظروف ضاغطه شديد لازم نتفقد بعض )
٩/حتبنيهو ولا حا تسافر تخليهو....؟!
وطن مالك زمام أمرو **ومتوهج لهب جمرو
وطن شامخ وطن عاتي ** حنبنيهو البنحلم بيهو يوماتي
١٠/ كلمة ختااام للبرنامج والجمهور.....؟!
فكره البرنامج محترمه خصوصاً إنها جايه من إنسان محترم وصاحب فكر عالي بالتوفيق حبيبنا باشمهندس أسامة وواصل في إبداعاتك
رسالتي هي لطلاب هندسونا (قد نختلف في المفاهيم ونختلف فكرياً وسياسياً وغيرو بس الحاجة الثابته إنو ما يجمعنا أكثر مما يفرقنا لازم نقيف في مسافة واحدة في حضرة قضايانا والراجينا كتيير)
رسالة في بريد منظومات كلية الهندسة (إدارة _ أساتذة _عمال) كل واحد من حقه يجتهد في رفعة المنظومه بتاعته بس في تقاطعات بتلمنا وبتجمعنا كلنا تعالو كلنا نجتهد في رفعة هندسونا ونرجع ليها الألق وفخامة الإسم
من الجمهور.....
إذا فكرت يوم في الانضمام لتنظيم سياسي داخل كلية الهندسة ... اي التنظيمات الساسية سيكون الاقرب الي تفكيرك ؟!
بحترم كل التنظيمات المتواجده داخل أروقة الكلية ومايجمعني بيهم كل الود والإحترام وجلسات النقاش.
متى ما وجدت التنظيم البعبر عن الإرادة الحقيقيه ما بتردد في خوض التجربة السياسية