نجوم في سماء هندسونا (سلافة عباس)
نجوم في سماء هندسونا (سلافة عباس)-مدونة وائل
بسم الله والصلاة والسلام على رسول الله الكريم سيدنا محمد وعلى آله وصحبه وسلم ..🤍
بسم الله نبدأ أول لقاءات برنامج "نجوم في سماء هندسونا " مع الباش مهندسة أمل حمزة
1/الاسم عرفينا عنك شوية البطاقة التعريفية....؟!
اولاً بسم الله والصلاة والسلام علي رسول الله وعلي آله وصحبه وسلم.
أمل حمزة علي محمد .
السكن :مدينه عطبره .
الدراسه: كليه الهندسه والتقنيه المستوي الرابع تخصص تصنيع .
2/تجربتك مع العمل العام في الكلية....؟!
العمل العام عرفني بشخصيات مميزه جدا وكتيره وخلاني اعرف كيف اتعامل مع كل شخصيه ..تبادل الافكار والمقترحات وطريقه حل مشاكل معينه في وقت معين دي كلها إفاده كبيره وبتبني الشخصيه وبتعزز الثقه بالنفس..والحمد لله كلها تجارب جميله ومفيده .
3/عموما البنات داخل الكلية بعيدات بصورة كبيرة عن العمل هل ده شكل ليك عائق....؟!
لا ابداً ..كل زول بشخصتوو طبعاً..يعني انا لو اترشحتا عشان اكون في برنامج او امسك منصب معين في مكتب ولقيت نفسي بقدر ابدع و افيد في المكان دا ح اعمل كدا طوالي .. م ح اتمسك ب هل في بت غيري في البرنامج ؟ او في المكتب ؟ .. لانو لو فكرتي بالطريقه دي حتمر السنين وحتلقي نفسك ضيعتي فرص كتيره كان ممكن تبرز موهبتك او انو تقدمي افكار ومقترحات كان ممكن تضيف كتيرر ..وانا بشوف فتره الجامعه دي هي الفتره البتبني الزول من كل النواحي وبتطور ابداعاتو وبتنميها .
4/شخصية داخل الكلية بتكني ليها الاحترام....؟!
المُحتَرم يُحتَرم 💛
كل شخصيه تَحترم الاخر وتتعامل بطريقه كويسه وم بتسبب اي نوع من الأذي او المضايقات وتتقبل الراي وتُقدِر المجهودات حتي لو بسيطه تُحترمم .
5/تفتكري اهم مشكلات العمل العام في الكلية شنو..؟!
عدم الاتفاق ..وانو الناس بتقيف في النقاط الصغيره وتعمل منها مشاكل وخلافات كبيره وم مستاهله .
لو الناس فكرت في الناتج حتلقى انو متفقين علي هدف معين ف مافي داعي للخلافات البتسبب تشتت الافكار والتردد في طرحها ..كل مايكون أعضاء المكتب ناس متفاهمين وبسمعو افكار بعض وكل زول يضيف عليها حيكون الناتج حاجه عظيمه .
6/حاجة مفروض تكون موجودة في الكلية حسب وجهة نظرك..؟!
الكليه محتاجه الكتيررر -(مظلات ،لابات حاسوب اكتر وفيها كورسات مفيده وتدريب علي برامج اكتر عشان الناس م تحتاج تشوف كورسات من بره ....).
-الكليه محتاجه (مننا) برامج جديده (محاضرات تثقيفيه وتعريفيه عن كل تخصص (عشان لما زول يسال يعني شنو التخصص الفلاني ) مثلا .ومصاحب ليهو معرض يحوي مشاريع او ابتكارات واختراعات للطلبه ومنها تكون فرص عشان تظهر ابداعات كتيره م لاقيه فرصتها .
-برنامج للبرالمه اول ما ينزلو شامل (كيف تتعامل مع المرحله الجديده دي وكيف تقرا وم تشيل هم ونوريهم الجانب الجميل وانو م قرايه بس في جمعيات خيريه في عمل عام والكليه منتظراكم ووو.. والكلام السمح دا )لانو بالجد بكونو مصدومين من اي شي وظاهر في وشهم ودا حالنا كلنا طبعاً اول مانزلنا😂 .
-اسبوع مهندس (الاجابه الثابته😂) لكن بالجد محتاجين جدا ولو الموضوع دا بدينا نشتغل عليو حيطلع حاجه عظيمه جدا جدا 🔥.
7/تقيمك شنو لرابطة طلاب كلية الهندسة والتقنية..؟!
ماشاء الله شايفه بدايتهم ممتازه وشغلهم ملموس وملحوظ جدا💛منتظرين من الرابطه الكتير ..وخاتين فيها آمال كبيره جدا وان شاء الله حيكونو قدر الثقه دي وربنا يعينهم.
8/احكي لينا تجربتك مع جمعية سواعد الإخاء الخيرية..؟!
اجمل تجربه في تاريخي الجامعي حقيقة ..مع كل "اكتمل المبلغ" ،"الموضوع اتسهل ..الجهه الفلانيه وافقت" الزول بتكييف وبحس نفسو مع زحمه القرايه والتستات والمحاضرات بعمل في جزو من الاشياء الخُلق عشانها ..مع ضحكات اطفال (دار الطفل) وانو كييف كانو مبسوطين في كل زياره دي براها حاجات م هينه ..وسبحان الله كل ما نبدا في مشروع معين ببدا بتساهيل من ربنا ..كل مانقيف ونتحير في شي بعدها بساعات بنلقي الموضوع انتهي ومدفوع كامل وب اي حاجه 💛 والحمد لله انو الناس بتتحمس مع عمل الخير واي زول في يدو حاجه م قعد يقصر والله ..حقيقي سواعد الإخاء بالذات السنه دي خلتني اكتشف في نفسي الكتير ..(التفكير المتواصل في برنامج معين والافكار البتجي الساعه ٢ صباحا وكيف اقنعهم انو هي فكره سمحه ) ..(الالتزام بمواعيد الاجتماع ،التحكم وضبط النفس وكيف تصبح انساناً صبوراً😂 ..كيف تقدر تتحكم في مشاعرك وم تظَهِر إنك حزين او تتماسك لما تتعامل مع حاله او حوجه وكيف تقدر تساعد بدون ما تسبب 1% حرج او انكسار للطرف التاني..الحمد لله جدا وربنا يسهل الباقي كلوو ونحنا مرحبين جداً ب أي زول حابي ينضم لينا وللتيم الفخوره جداً انو انا جزو منو 💛.
9/نصيحة تقدميها لطالبات كلية الهندسة والتقنية..؟!
كليه الهندسه فيها كميه من الطالبات الموهوبات جدا جدا ..رسامات ..مصممات بوسترات كاتبات ومواهب كتيره كتيره ممكن تكون مخفيه وراء كواليس كل برنامج كبير اتدشن في الكليه ! ..إنتي موهوبه وكل صغيره وكبيره منك بتضيف الكتيرر. نصيحتي كل ماتلقي فرصه ولو صغيره استثمريها اعرضي شغلك ومواهبك وطوريها م تترددي ابدا طول ما إنتي شايفه انو بتعملي في حاجه صاح ومافيها ضرر لزول..لو حتفيدي غيرك أو حتغيري شي أو تضيفي اضافه جميله .. ونحنا بنعزك وبنقيف معاك ..م تترددي ابدا ابدا 💛( حتلقي التطبيل ببدا قبل ماتبدي والله بنعزك😂).
خلي تغير مفهوم انو "نحنا منسيين وم مستمتعين بالجامعه وبرامجها ووو" يبدأ منِك وعيشي فتره الجامعه بحذافيرها واستفيدي منها وأصنعي ذكريات لانو م حتككرر .💛
ختاماً "الحمد لله الذي ستر القبيح وأظهر الجميل وزيننا بستره " شكرا علي الفرصه الجميله دي . 💛
مشكورة جداا ي باش مهندسة على هذا اللقاء الجميل جداا 💛 وإلى لقاء آخر.