نجوم في سماء هندسونا (محمد علي يوسف)

نجوم في سماء هندسونا (محمد علي يوسف)

نجوم في سماء هندسونا (محمد علي يوسف)-مدونة وائل

لقاءات "نجوم في سماء هندسونا"

مع الباشمهندس محمد علي يوسف

١/ عرفنا عنك البطاقه التعريفية...؟!

محمد علي يوسف قسم الله.. من عطبرة حي المطار.. امتحنت الأساس من مدرسة الظافر و الثانوي من الجديده ثم صرح كلية الهندسة و التقنيه..

٢/ حاجه المفروض تكون موجودة في الكلية حسب وجهة نظرك...؟!

اكاديمياً الكليه ناقصها كتير.. و بكل صراحه محتاجه مقررات مواكبه للعالم و دكاتره و اساتذه متفرغين للتدريس و بطرق غير التقليديه الحاليه ..

٣/ لو قلت ليك عايز اجيب معدلات عالية بتنصحني بي شنو....؟!

والله الموضوع أولاً و أخيراً توفيق من الله عز و جل.. بس انت تاخد بالاسباب.. متابعه اول ب اول.. و ما تشتغل ب المحبطين.. تنظم نفسك و زمنك.. إن شاء الله امورك كلها بتتسهل

٤/استاذك المفضل منو....؟!

والله في مجموعه من الاساتذه متميزين و بالذات في قسم المدنيه.. بس بالنسبة لي ممكن تقول دكتور أبوبكر أحمد

٥/ ليه البروفات بشرحو للبنات بس....؟!

وين ديل انا ما شايفهم؟ .. بالنسبه لي ما بعرف زول بالفهم دا ولو في بتمنى يتغير لان ماف حاجه بتفرق الوالد من البنت و العلم مسؤوليه و نشره واجب..

٦/ قبل كده كنت جزء من نشاط قام ضد المشاغلات في رايك الحل شنو....؟!

والله بغض النظر عن كل أطراف الموضوع.. انا واحد من الناس عندي غيره اتجاه الهندسه و المهندسين.. و كونك تكون طالب هندسه و سيء اخلاقياً دي حاجه ما بتعبر إلاَّ عن عدم استشعارك للمسؤوليه بدخولك تحت مظلة هذا التخصص.. ف الموضوع اولاً و أخيراً تقييم ل نفسك قبل تقييم للمجتمع ال حولك.. فلو كل واحد حسَّ بحجم كلمة ( باش مهندس ) و ما عليها من تبعات كان احترم نفسو.. ف الحل الناس من تدخل الكليه يكون في حملات توعويه و تصحيح سلوك ل اي زول جاي بفهم تاني عشان الناس تحس بالمسؤولية..

٧/ هل بتعتقد انو العمل العام بأثر على الجوانب الاكاديميه....؟!

لا أبداً.. النجاح ما فقط أكاديمي بالنسبه ل طالب الهندسه.. لو طلعت من كلية الهندسة و انت غير قادر على الدخول في المجتمع و صنع شبكة علاقات و شخصية مؤثره في محيطها يبقى انت فقدت ركن لا يقل من شهادتك و معادلاتك.. بس في نفس الوقت ما تخلي العمل العام يشتغلك عن هدفك الأساسي.. و حاول سدد و قارب قدر المستطاع

٨/ علاقتك كيف مع الجنس الآخر....؟!

علاقه جيِّده و الحمد لله

٩/حتبنيهو ولا حتسافر تخليهو....؟!

والله لحد الآن ما حددت الطريق دا بس ان شاء الله الواحد يجتهد و يشوف ل قدام يحصل شنو و ربنا يعمل ال فيهو خير

١٠/ لو رجع بيك الزمن حاتدخل الكلية دي تاني...؟!

اكيد

١١/ شخصيه معجب بيها في الكلية...؟!

والله ماف شخصيه معينه.. ف شخصيات كلية الهندسة و التقنيه كلها شخصيات يسعد الواحد ب معرفتها و خوتها والله.. بس بالنسبه ل الشخصيات في اللقاءات شخصيه الباش مهندس عثمان تلاف كانت الحائزه على أكبر قدر من الإعجاب..

١٢/ حسب وجهة نظرك بتفتكر انو كان في شنو الرابطه مفروض تقدمو وما عملتو...؟!

صراحه الرابطه مكافحه و ما قصرت و الفتره ال اشتغلت فيها كانت فتره متعبه و الكليه و الجامعه ما مهيئه لإقامة النشاطات المختلفه.. بس بتمنى قيام المؤتمر الأكاديمي ال كان تم الإعلان عنه قبل كدا..

١٣/ حاديك باقه ود تقدمها لي اي دفعه من الكلية غير دفعتك طبعا....؟!

أديها دفعة آفاق الدفعة ألكان و ما زال ثقتي بيها كبيره من اول ما دخلت الكليه و كل مره بتطلع لينا نجوم على مستوى العمل الأكاديمي و الاجتماعي و الثقافي ..

١٤/كلمة ختااام للبرنامج والجمهور....؟!

اولاً اشكرك على الاستضافه و على العمل الكبير القايم بيهو و بتمنى ليك التوفيق والنجاح.. و بحيي كل طلاب كلية الهندسة و بتمنى ليهم عام جديد خالي من العوائق و المشاكل و ال تقفيل و العطل ال بلا سبب .. و نسأل الله التوفيق و السداد ..

من الجمهور.....

احكي لينا قصة البرلومة...؟!

والله ي ناس ماف اي برلومه ولا حاجه لحد اسي ( بس يمكن يكون في القريب ما بعيد ).. القصه طبعاً من أيام الإجازات الأولى و كنت بحاول اصنع نشاط و انا من الثانوي بكتب قصص و شعر و كدا ف زيي و زي اي زول كاتب بيفتش عن شخصيه خياليه يصطنعها و يكتب فيها ف كنت بكتب كتابات و بوجهها للبرلومه و اللي هي ما موجوده للواقع..

انت كزول بروف في الاجازة بتشتغل شنو...؟!

والله الحمد لله الواحد وين ما يلقا شغل بيدخل فيهو.. بس ف السنين الأخيره الواحد ركز على التجاره و على الشغل في مجال الهندسه المدنيه نفسها..

هل انت راضي عن الوصلت ليهو...؟!

اي الحمد لله..

السؤال دا ذكرني حاجه و اذكر بيها الشباب

عموماً في كل شيء انا بشوف الرضا أحد أسباب النجاح.. لما ما تكون راضِ بقسمة الله تكون عايش في ضغط نفسي يؤثر عكساً على مجهودك و نشاطك و رغبتك.. و لكن العكس لما تكون راضي بتكون حالتك النفسيه كويسه و بتقدر تراجع نفسك و تشوف أماكن ضعفك و تقويها و التوفيق من الله..

كتير من الباش مهندسين ظروفهم هي ال جابتهم كلية الهندسة دي و كان رغبتهم أكبر و ليهم أحلام و طموحات غيرها.. بعرف ناس حالتهم النفسيه ساقتهم ل انهم يكسرو الحنك و دا طبعاً أثر سلباً و فشلو أكاديمياً رغم انهم ناس ممتازين.. فبقول لي اي زول عندو عدم رضا ب واقعو انت كدا بتضيع في زمنك و قروشك! اما تغير الواقع دا.. ولو كان ماف اي طريقه تغيير ارضى بيهو و انت ما عارف الخير وين ف يمكن ربنا كاتب ليك الخير هنا ! ف اجتهد و أسأل الله التوفيق.