نجوم في سماء هندسونا (عثمان تلاف)
نجوم في سماء هندسونا (عثمان تلاف)-مدونة وائل
لقاءات "نجوم في سماء هندسونا"
مع الباشمهندس عثمان محمود تلاف
١/عرفنا عنك شوية (البطاقه التعريفية)؟!
الحمد لله وحده وبعد:
عثمان محمود أحمد تلّاف ، ولدتُ في شندي ومعظم المراحل التعليمية في شندي ، وأخيراً هندسونا الزاهي لونا، وهسي برلوم في مدرسة الحياة. مهتم بالأدب والفكر.
٢/ هل بتفتكر أنو قائمة الإصلاح كانت ممكن تقدم أداء أفضل من الاتقدم ده؟!
أي نعم وبكل تأكيد ، لأسباب منها: معظم الناس الفي القائمة عندهم تجربة في العمل العام ، الحاجة التانية ممكن تكون أفكارنا واحدة ورؤيتنا وأهدافنا البننطلق منها شبه موحدة. فعشان كده كان واضح إنه حتكون تجربة ثرة.
٣/ الكوادر السياسية هل بتقدم للعمل العام ولا بتخصم حسب وجهة نظرك؟!
أي كادر سياسي بطبيعة الحال هو عامل في الفضاء العام، وعموماً الموضوع فيه تداخل كبير ، وعملية الفصل محتاجة شعرة معاوية.
وفي تقديري الشخصي بميّز بين مستوين بالنسبة للكادر السياسي العامل في المجال العام غير السياسي:
في كادر أصلاً بشتغل عمل عام وبرامج وأهداف حياتية ظابطة بشتغل عليها قبل التحزب وبعدها. أو مبادئه تدعوا للعمل العام بصورة حرة بيستطيع الكادر يلقى فيها نفسه ويحقق موهبته.
وبين مستوى كادر بحترف ويتعلم العمل العام خارج أروقة التنظيم بغرض تنظيمي محض. أهو ده البقزم رحابة العمل العام سواء كان ثقافي ولا إجتماعي أو خدمي لأجندة تخدم مصالح الحزب البنتمي ليه الكادر السياسي ده.
وده بخصم بلا شك من العمل العام وينفر منه. وواقعنا السياسي على مستوى وطننا الرحيب خير شاهد.
٤/ رأيك شنو في الظواهر السالبة البدت تظهر في كليتنا (الخلط والمخدرات والزي الفاضح.. الخ)...؟!
شوف نحن كلنا مسلمين والمسلم بطبيعة الحال غير محايد أبداً لأنه عنده قيم وأسس بنطلق منها. أها المبادئ البننطلق منها ضد الواقع ده تماماً. وربنا قال: " كنتم خير أمة أخرجت للناس تأمرون بالمعروف وتنهون عن المنكر" فموضوع الخلاص الفردي وخلو الخلق لي خالقها ونظرية الأخ الكبير ما معانا هنا.
وهنا أحب أبعث رسالة لكل زول ربنا أداه قدرة وقبول من الطلاب والطالبات على التغيير في الواقع السيئ الما برضي عاقل ده إنه يتق الله ويتذكر حديث النبي صلى الله عليه وسلم: " من رأى منكم منكراً فليغيره". صدق رسول الله صلى الله عليه وسلم.
٥/ لو رجع بيك الزمن حتغير شنو في حياتك
راضي عن نفسك؟!
حاجات كتيرة الزول متمني يغيرها في نفسه والله. لكن أكتر حاجة شايفها مهمة لو رجع بي الزمن إني اقرأ واتعلم كويس وأكّون معرفة ممتازة أقدر أفهم بيها نفسي والناس والواقع. واجتهد في شغل ليه عائد مادي كويس.
٦/ حسب خبرتك أكبر المشاكل البتواجه العمل العام في الكلية؟!
في المرحلة الأنتو فيها في الكلية محتاجين توحدوا صفوفكم وتقدموا مصلحة الكلية وتحاربوا الشلليات.
٧/ حا أديك أربعة مناصب في الرابطة القادمة ترشح لي أسماء
الرئيس _الأمين العام_الامين الاعلامي_الامين المالي...؟!
ما بهمني أسماء المرشحين في المقام الأول بقدر ما في يهمني أنهم يكونوا ناس مسؤولين وعندهم ضمير وبتهمهم مصلحة الكلية والطلاب ويكونوا كفاءات.
٨/ من مصادر موثوقة وصل لي أنو قرار انسحاب قائمة الإصلاح تم من غير مشورة أعضاء القائمة؟!
موثوقة قدر شنو؟ ههه
على العموم كانت تجربة جميلة وسعيد بكل الشاركت معاهم.
وقرار الإنسحاب ده أمن عليه كل القائمة على ما أذكر. وما بستبعد إنه يكون نسينا زول. نظراً لضيق الزمن وتسارع الأحداث وكده. لو حصلت حاجة زي ده اعتذاري لكل الشباب الاتشاركت معاهم.
٩/ أكبر المشاكل البتواجه الطلاب بعد التخرج وعقبة الزواج؟!
أيوه دي الأسئلة ياخ ههه حل عننا شوية.
طيب أهم شي تكون تصور صحيح عن الحياة خارج أروقة الدراسة من بدري. أنا بركز على النفع من السؤال أكتر من أديك إجابات وخلاص. المهم أنصح أي طالب يخش معترك الحياة " السوق، البحث عن مصادر رزق مناسبة مع الشخص" ، القراية براها ما بتنفع. تاني العرس هين إن شاء الله.
١٠/ هل انت مع تولى الطالبات لمنصب الرئيس في المكاتب التنفيذية أو لا....؟ولية؟!
طبعاً شرعياً هنا ما في مانع إنه الأنثى تشتغل شغل عام ويكون تحت امرتها رجال. الحديث جاء في مسألة الخلاقة والمناصب العليا في سياق الذم. لأنه في فرق كبير بين الرجل والمرأة. والموضوع طويل. ما عارف ليه حاسي بأنه الأسئلة دي مفخخة!!
عن نفسي ضد تولي الطالبات للمناصب الإدارية. والموضوع ده ما عشان أنا ذكوري وابجيقة بقدر ما هو سلسلة طويلة محتاجة تفصيل ما يسعه المقام. لو في واحد/ة عايز/ة يعرف حبابو الخاص مفتوح.
١١/ شخصية بتكن ليها الإحترام داخل الكلية؟!
في شخصيات كتيرة جداً ، لكن أفسح مجال الإحترام والتقدير في المقام ده ل(عبدالله تنقا💙) ، مع إنه علاقتي بيه ضعيفة جداً، لكن شخصية محترمة جداً.
١٢/ الحب بالنسبة ليك شنو....؟!
يا سلااام ياخ، أنا بحب الحب جداً ، وزي ما قال واحد صاحبنا: "الحب حكة في القلب لا نستطيع أن نحكها ". حاجة عصية على الفهم . لكن ببدا بالاهتمام والنقاط المشتركة في الشخصية والاهتمامات. والحب عملية بتتولد مع الزمن. فما في حب من شهر ولا سمستر. والموضوع يطول. ولو بتسأل من قلة الأدب الحاصلة دي فده موضوع براه بالمناسبة.
١٣/ بتتهم إنك كادر سياسي وما أنصار سنه؟!
المشكلة أنا محتاج أعمل قاعدة مشتركة بيني وبين الناس عشان يفهموني كويس. لأنه الزمن أتغير شديد والمفاهيم بقت مقلوبة جداً. المهم كوني أتهم بأني سياسي ما عيب. والسياسة دي جزء من دعوتي كمسلم عنده رسالة. واضحة؟
١٤/ كلمة للبرنامج والجمهور؟!
استضيفوا منوفلي عنده تجربة ثرة في المجال العام.
وفكرة البرنامج جميلة جداً ، بس عصرتوا علي جداً ياخ ههه.
واصلوا وقدموا عمل جميل، وأتمنى أنه كل الشباب يقدموا برامج ويبتكروا شغل جميل زي ده.
من الجمهور...
١/في الأيام الأولى بعد إعلان نتائج الإنتخابات كان ملاحظ أنو الجماعة ( و أنت واحد منها ) كانت معارضة تماماً للرابطة .. رأيك شنو في الكلام دا و سبب المعارضة كان شنو ؟
عن نفسي كان واضح جداً الموقف الحاد تجاه الرابطة، وخصوصاً بعد مشكلة القروب ده " هندسونا" الهي " من أجل رابطة كلية الهندسة والتقنية" ، وطبعاً ده غير جو الانتخابات والمنافسة الشرسة فكان أي تصرف يحسب ألف حساب.
أما بالنسبة للجماعة فواضح في كتير منهم دعموا الرابطة وفي جزء ضدها وفي جزء محايد والتعليقات واضحة في الفيس وغيرها يعني.
٢/الناظر لجماعة انصار السنة في السنوات الاخيرة و في الاعوام 14-15 يلاحظ اختلاف كبير من حيث النشاطات و الفعاليات و التفاف الطلاب حول الجماعة ،،، في تقديرك السبب شنو في الاختلاف دا ؟ و هل تتوقع انو ممكن الجماعة ترجع كما كانت في العهد القديم ؟
التغيير سنة الحياة ، واضح إنه الواقع أتغير والخصوم اتغيرت ومجالات التأثير بقت متاحة فطبيعي يكون في تغيير. يبقى السؤال هل التغيير ده للأحسن ولا للأسوأ ؟
في النهاية الزول بقدم أحسن ما عنده والقبول والهداية بيد ربنا.