نجوم في سماء هندسونا (منذر حركه)
.jpg)
نجوم في سماء هندسونا (منذر حركه)-مدونة وائل
لقاء"نجوم في سماء هندسونا"
مع الباشمهندس منذر عبد العظيم
١/ عرفنا عنك شوية البطاقة التعريفية....؟!
الاسم: منذر عبد العظيم عبد الفتاح محمد البشير ، الاسم السائد ( حركه ) ، مدرسة شندي الجنوبيه بنين ، ثم مدرسة دار المعالي الاساسيه بنين ، ثم مدرسة دار المعالي الثانويه بنين ، من ثم الالتحاق بكلية الهندسه جامعة وادي النيل قسم الهندسه الميكانيكيه .
٢/طبعا أهم موضوع ممكن الزول يبدأ بيهو كيف الزول يقدر يحفظ القرآن الكريم ؟ وشعورك شنو لمن ختمت القرآن ؟
الحمد لله على نِعمه ظاهراً وباطنه ، لاشك أن القرآن علم وسبيل يسلك وغايةٌ للجنة تدرك و من سار على درب وصل ، فحفظ القرآن مشروع لا يقبل الخساره وإن كابدته العمر كله بين صفحاته فهو أُنس للقلوب و للنُهى ( مقدمه) ، فمسألة الحفظ لا تعتمد علي الشطاره او نظافة المخ او ما شابة ذلك ، انما هي مسألة توفيق ما أكتر ، و التوفيق يكون علي قدر الأقبال و إخلاص النيه و الدعاء ، فالانسان يستعين بالله ويبدأ والله في عونه ، وليكن في باله ( لا ابرح حتى ابلغ) .
٣/ حاجه المفروض تكون موجودة في الكلية حسب وجهة نظرك....؟!
والله يااخ شوف انا من وجهت نظري الاضافه المفروض تحصل مفروض تكون إضافه في المجال الاكاديمي بي صوره عامه .
٤/ أهم الأسباب الخلت دفعة شوامخ غير قادرة. على تكوين مكتب تنفيذي بعد المكتب الأول....!
؟!
العمل العام في كلية الهندسه انا دائما بقول انو
( حِلومر) ، يعني علي قدر ما انو بديك بياخد منك عندو ضريبه بياخده غايتو ... ، تجربة رئاسة دفعة شوامخ من أجمل التجارب الخضتها ، كانت البدايات ممتازه جداً خلقت تلاحم كبير وإلفه في المكتب ، وإمكن أثرو ظهر في فتره وجيزة ، وانو دي دفعة جديد في الكلية ماشه في طريق اقل ما يقال عنو ممتاز ...( ما قبل النكسه) ، بعدها حصلت الاجازة الكبيره البعد الثورة و الاحداث الكتيره في الفتره ديك ، و انا كنت بعدته فتره من الكلية لي ظروف سفر خارجيه ، فا لمن جيت لقيت انو حصلت انتكاسه كبيره في الدفعة و الشُللِيات رجعت تاني اكبر من الاول ود كانت(القشه التي قصمت ظهر البعير) ، وعجز الدفعة علي إنو إرشحوا شخصيه جديدة تقود ( رجعنا لي نقطة الصفر ) .
٥/ تفتكر أهم مشكلات العمل العام في الكلية شنو.....؟!
اكبر مشاكل في العمل العام في الكلية ، انو في ناس عندها تجارب كبيره جداً في العمل العام و قبول يكاد يصل حد الاجماع وحضور في الكلية ليهو وزن في كل الارصدة المختلفه ، خبرات في العمل العام تمكن من قيادة دفة الكلية للبر في ظل الضبابيه الحاصله دي ، فاا بتجي المشكله انو في ناس ما عاوزين الشخصيات دي تشتغل وما دايرنهم في الصوره خالص فا بكسرو مجاديفهم بي اي شكل من الاشكال ، وهم في نفس الوقت ما دايرين إشتغلوا ( مثبطين يعني) .
٦/ تقييمك شنو لرابطة كلية الهندسة والتقنية....؟!
انا امكن الفتره الكنت فيها بعيد من الكلية دي خلقت مساحه بيني وبين العمل العام ، حتى تقيمي ليها ما حا اكون قطعي تماما ، مبني علي نظرتي لي الرابطه في الفتره البسيط دي الواكبتها( شاهد مشفش حاجه ) ، بس انا شايف انو هى كتجربه رغم العقبات و الاحداث الكتيره الحصلت في الفتره الاخيره دي فاا تقيمي ليها تقيم اقرب للنجاح يعني .
٧/ شخصية بتكن ليها الاحترام داخل الكلية...؟!
كلية الهندسة ولله الحمد مليانه شديد بالشخصيات البتفرض عليك انك تحترمهم و تقدِر و جودهم ودا على وجه العموم وليس الحصر يعني ، كل شخصيه بي طعم خاص و مذاق أجمل ، بس اكيد بكونوا في ناس ليهم ركن خاص في الاحترام وهم برضو كتار والله ، و امكن الخصهم في شخصتين جامعين للخير ( محمد فتح الرحمن "الحبيب" ، و عثمان تلاف "شيخي" ) .
٨/ رايك شنو في الظواهر السالبة البدت تظهر في كليتنا....؟!
كلية الهندسة ليها ارث وافر في شكل التعامل الاجتماعي و شكل الممارسات و السلوكيات البتحتم علي الطالب الجديد انو اسير وفقها ، و الارث دا متوارث ( أجيال بتسلم أجيال ) ، و طريقة التخصيب دي بتحصل لمن البرالمه انزلوا جُداد و السناير اكونوا معاهم ، فا بطبعوهم بي طباع الكلية ( هوي يا برلوم ، اوعا يا برلوم) ، لكن حصل العكس البرالمه نزلو براهم وعدو فتره طويله بالحال دا ، والفتره دي مكنت انو تجي كل الظواهر السيئه دي ، لكن برجع وأقول ( سنُعيدها سيرتها الاولى ) .
٩/ الكوادر السياسية هل بتقدم للعمل العام ولا بتخصم حسب وجهة نظرك....؟!
الكوادر السياسيه في الكلية ( الدوري الصيني) ، معظم الشخصيات السياسيه الموجود الان بقى همها الكبير انو اكون عندها يد داخل الرابطه ما اكتر من كدا (حفير) فهى دايرا تخدم اجنده سياسيه مغلفه بي مطالب طلابية ( ما كلهم طبعا) ، في ناس فيهم ما كعبين والله .
١٠/كلمة ختااام للبرنامج والجمهور......؟!
ختاماً سعيد جداً جداً بالمساحه الطيبه دي ، وبشكر الباشمهندس : اسامه سراج الدين علي البرنامج الجميل دا ، لأنو خلق حركه رائعه في إطار الشغل الاعلامي داخل الكلية ، ونصيحتي الاولى و الاخيره للجميع يعني أن اتقوا الله وتعاونوا على ما فيه الخير تفلحوا بإذن الله ، و السلام عليكم .